Ofang
Als Kerwevadder war ich geplant 2003, 2004,
2005 steh ich jetzt hier.
Ich begrieß eich drum vun ganzem Herze,
un hoff ihr verstehn, wenn ich mach mei Scherze.
Vun Nah un Fern sinn ehr Heit kumm no Klä Paris,
um do se stehe zu meine Fieß.
Ich denk ehr Leit huns schun venumm,
heit steh mer uff de Läder emol annerscht erum.
Mer hun uffgeschreb wirrer schäne Geschichte,
iwwer Mitbürger, die`s gibt se berichte.
Ich versuch mit dem was bassiert iss bei de Wohret se bleiwe,
un du vielleicht emol e kläänes bissje iwwertreiwe.
Vesprechen mer eich net se eiere,
statt desse e schää Fest mit uns se feiere.
Die Kerb werd wirrer gefeiert fünf lange Daa,
awwer das muss ich eich do unne jo net se saa.
Ich glab die meischte sind schun ganz nervees,
ich steh do howwe un vestehs.
Ihr wollen wisse, ob do in unserm Kerweschatz,
drin steht üwwer eich de ä orrer aner Satz.
Un ihr Leit dun bitte net glei knottere,
aach wenn ich du mol stottere.
Ich kanns schun nimmi abwade,
drumm du ich mit de Redd jetzt starte.
Ämol du ich awwer jetzt noch on meim Gläsje labbe,
dass das met de Redd dut besser klabbe.
Maibääm
Aach Dissjohr hot mer sich wie jedes Johr on Hexenacht,
zum Bääm hole mit e paar Leit in de Wald gemacht.
Im Schwarzegräwer-Laacher dann endlich ingetroff,
sinn die Männer dann se erscht emol de Wald abgeloff.
Uff ämol hun se dann erblickt bei ihrer Suche,
e wunnerschänie Birk zwische Danne un Buche.
Ei der iss jo werklich wunnerbar,
den nemmen mer, des iss doch klar.
Ach Gott, saat plötzlich äner, do sinn jo drei griene Kreizjer druff,
scheißegal den mache mer um, des fällt schun kääm uff.
Gasagt, getan, die Männer hun ogeschmiss ihr Sää,
do hot des Ding aach schunn im Wald gelää.
Mit veeinte Kräfte hun se den Bääm dann aus em Wald getraa,
uff emol kummen die Delwer mit ihrm riese Fuhrpark ogefahr.
Die warn dann kaum aus ihre Fahrzeuge ausgestieh,
do kaam die Frage: „Hun ihr e Bääm mit drei griene Kreizjer gesieh?“
Äner hot dene ihr Makierung dann zugehall,
un hot gemähnt: „Nä, nä uns is do nix uffgefall.“
Die Männer hun dann noch e Bier getrunk,
den schäne Bääm uffgelad, un de Delwer nochemol gewunk.
Korz druff sinn se dann schun ball,
no Gerbach gefahr, fer des Ding uffsestelle an de Hall.
Es hot net lang gedauert, do sinn die Delwer an de Hall vorbei gefahr,
un hann e Bääm uff de Roll leie, der war fascht genau so wunnerbar.
Un die Moral vun der Geschicht war die,
so was gabs in unserm Dal noch nie:
Mer han dene ihr Maibääm nämlich schunn gefällt,
bevor die ne iwwerhaupt hatten uffgestellt.
Errare humanum est (Irren ist menschlich)
Immer fer e Iwwerraschung gut,
is jemand, wo drowwe uffem Althof wohne dut.
Dass diejenich bei de Bollizei schafft, is vielleicht net jedem bekannt,
awwer fer die Geschicht do, vollkommen irrelevant.
Vor korzem uff jeden Fall, hot se sich ausgedenkt sodann,
dass mer mit rer Fahrgemeinschaft einiches an Geld spare kann.
Sie hot dann hie un her iwwerleet,
dann warer ingefall, dass de Matthias jo ach in Meenz schaffe geht.
Dem kam die ganz Sach aach net ugelää,
denn wammer net immer fahre muss, das is richtich schää.
Om nägschde Dag hot mer dann auspowiert soglei,
die nei Gemeinschaftsfahrerei.
Es hot alles super geklappt wie nix,
Bis zu jenem Mittag om Dag „X“.
Endlich, vertel no vier, de Feierowend is do,
un vegnügt is se mit Sack un Pack Richtung Ausgang gezoo.
O, mei Fahrer is schun do, dut se sich do freie,
do kann ich jo direkt ins Audo steie.
Die Deer uff, ingestieh, in de Hoffnung, dass der Matthias glei fährt,
stattdesse hot se vun links nur: „Stopp, falsches Audo!“ geheert.
Sie guggt eniwwer, de Kopp fängt o rot se glieh,
denn den Mann om Steier hat se vorher noch nie gesieh.
Wirre Gedanke sin er dorch de Kopp geschoss,
un genau so schnell wie se drin war, hatt se das Gefährt ach widder veloss.
Zum Glick es dann ach ball es richtiche „Taxi“ kumm,
un hot die Bianca statt no Wiesbade uff de Althof mitgenumm.
Ä Bemerkung hummer noch zu dere Geschicht:
„Dunkler Kombi“ allää langt fer e Fahrzeucherkennung ganz sicher nicht.
Inkaafsbummel
E Familie aus de Hinnergass die hot feschtgestellt,
dass ne ehr aldi Inrichtung nimmi so gefällt.
Un wammer do was neies sucht, ja das iss klar,
werd no Lautre zu Möbel Martin inkaafe gefahr.
Sie warn dann kaum in dem Geschäft dort drin,
do hun se sich aach schunn gesterzt in de Inkaafsrausch enin.
No dem se e Lamp kaaf hatten, hun se noch gesucht de Rescht,
während desse hot ihr Sohn emol die Fernsehsessel getescht.
Er hot sich gesetzt in e paar Modelle enin,
un hot gemerkt das die jo recht gemütlich sinn.
Aach leie konnt mer do drinn ganz ogenehm,
vielleicht fer sei Geschmack schun zu bequem.
Denn korz druff waren dem mitte in dere Inkaafshall,
die Aadeckel schun zugefall.
Sei Eltre awwer hun sich so mim inkaafe abgemieht,
dass die do de vun iwwerhaupt nix mit hun kriet.
Uff emol hun die sich ogeguckt un hun gemäht: „Jetzt saa emo,
unser Bub der iss jo garnimmi do.“
Die hun ne dann gesucht, un sein dorchs ganz Geschäft gerennt,
ihr Sohn hot awwer ganz in Ruh weitergepennt.
De Klaus un die Walli die sinn dann gelaaf on die Kass,
un hun ne ausrufe geloss, das war vielleicht was.
Es hot net lang gedauert, do iss de Jens dann kumm,
un war vum Schloof noch ganz benumm.
Sei Eltre, ja die warn dann froh,
das der Borsch war widder do.
E kläner Tip kriener vun mir do howwe jetzt noch rasch,
stecken em Jens es nägschte mol e Wecker in die Hosedasch.
E hoorischi Geschicht
Iwwer die Fassenachter dut mer on de Kappesitzung gern lache,
awwer manchmol dun aach die Besucher seltsame Dinger mache.
Dass es Owends on de Kass gibt kää so gedränge,
kriet mer die Karte im Vorvekauf in Große un kläne Menge.
Ä Gerbacher Grüppche hatt e ganze Disch vorbestellt,
dass sich jo niemand Fremdes dezugesellt.
Wie der große Dag dann war do,
iss mer bunt kostümiert do enuff in die Hall gezoo.
Die Oma Lu betret de Saal un war furchtbar geschockt,
hot doch tatsächlich jemand unbekanntes on ehrm Disch gehockt.
Sie hot dann zwäämol geblinzelt un emol mim Kopp geschnerrt,
nä, die Fraa war noch do, sie hatt sich net geerrt.
Die Lutzi hot gedenkt, ich setzt mich, un saa mo nix,
wann nochher kä Platz meh es, steit die uff ganz fix.
Sie hot sich dann gesetzt, dut noch „genowend“ saa,
guggt nochemol genau: „Nä, die kenn ich net die Fraa.“
Korz druff war se so mutich un hot sich se froe erlaubt:
„Guti Fraa, wer Sinn sie dann iwwerhaupt?
Hocken sich äfach on unser Disch do hie,
dirft ich ihr Intrittskart emol sieh.“
Do säät die Fraa: „Ei Lutzi du machsch doch e Spässje,
ich bin doch die Helga, drunne ausem Gässje.
Hosch Du mich net gekennt? Das iss jo e starkes Stick.
Ich hun doch nor uffgezoo mei alt, braun Perick.“
Awwer äns ehr Leit, das missen ehr wisse,
on dem Owend hun noch meh Leit zwäämol hiegugge misse.
Nordkap – Fahrt
No USA, Brasilie un Südafrika,
iss de Gesangverein dissjohr emol ons Norkap gefahr.
Dort hun sich zugetraa widder e paar schäne Geschichte,
un vun dene will ich eich heit emol Berichte.
Die Vewandtschaft vuns Fuchse hat ehr Wecker dehääm vegess,
deswee hot die Karola die immer mim Delefon aus em Bett geschmess.
On äm Moje dut das hausinterne Delefon awwer net funktioniere,
do musst unser Weckservice e bissje improvisiere.
Um die Leit dann wach se krie,
iss die Karola dorschs Fenschter uff die Strooß gestieh.
Dort hot se dann im Nachthemd so lang Stää ons Fenschter geschmiss,
bis vun dene endlich äner wach wor iss.
Aach e alter Bekannter war uff dere Fahrt debei,
un wass der getrebb hot vezehl ich eich jetzt glei.
Dem war irgendwann die Zeit so lang,
do isser grad emol in de Wald spaziere gang.
Er iss geloff, drei mol links un vier mol rechts erum,
dann iss er on e Kreizung kumm.
Dort horrer gestann un hot nur noch gedenkt: „mist“,
wie er widder serick kummt horrer nämlich nimmi gewisst.
Mit veel Glick hat de Edwin no rer gude Stunn,
dann doch wirrer serick zum Bus gefunn.
An äm annere Daach hot der selwe Mann, jetzt gewwen acht,
aus em Speiseraum e Konzertsaal gemacht.
In dem Saal hot nämlich e Klavier drinn gestann,
do hot er sich dann emol drogehockt, unser Mann.
On dem Ding horrer dann gespielt es ä orrer anner Lied,
un vun seine Sängerkamerade aach noch Unnerstützung kriet.
Die Männer hun dort kriet dann veel Applaus,
un de „Edwino da Fröhlich“ noch e Bier uffs Haus.
Die annere Touriste dort, dass iss jetzt net zum lache,
die wollten mit dene „Stars“ aus Gerbach aach noch Bilder mache.
So, dass war was ich iwwer die Fahrt hat do,
wer meh wisse will muss die Mitreisende froh.
Stop, ich hätt fascht vegess was ich eich saa wollt noch all,
die Isolde iss am Nordkap rickwerts aus de Badwann gefall.
Korznorichte
Weil so veel hun Klänigkeite getrebb,
hummer aach widder Korznorichte geschrebb.
An de Kerch hun se demletscht e Ampel uffgestellt,
mer hätt kenne mäne es wer die grecht Baustell vun de Welt.
E Vorbild fer alle ess em Mäschder sei Fraa:
Neilich isse mim Fahrrad on die rot Baustelleampel gefahr,
vorschriftsmäßich macht se dort mit ihrm Drohtesel halt,
un wart bis es Lichtzeiche uff „grün“ umschalt.
Aach Gerbachs junge Mütter nemmen am Stroßevekehr teil sehr bedacht,
sogar die hun mit de Scheese an de Ampel halt gemacht.
Beim Hönes Rainer do hinne ich saa´s eich all,
iss de Boller Willi demletscht in e Grawe gefall.
E paar Gäscht vun de Brick warn letschtens ganz schää froh,
das do unne uff de Baustell hot gestann e Dixiklo.
Dort sinn die dann nämlich hie gang fer se pisse,
un hun ihr Geschäft nimmi am Brickegeländer mache misse.
De Köhler Markus fährt e Audi A3,
mit dem isser iwwerall debei.
Bis an em bestimmte Dag,
do hots gedu e heftischer Schlag.
Er hot vum Albert seiner Geburtsdagsfeier,
hääm gefahr do unne unser Geyer.
Do owwe om Sportplatz hots Schicksaal dann sei lauf genumm,
do warer net schnell genug um die Kurv rum kumm.
Es hot gerappelt un aach gekracht,
do harrer plattgefahr de Wasserwerke ihr Wartungsschacht.
Wie de Alexander dann dezu kumm is do warer froh,
der hot ne vun dem Ding dann wirrer erunner gezoo.
De Hahne Helga, vielleich hunners in de Zeitung gesieh,
hot mer schun widder de Titel „Miss Lanz Buldog“ velieh.
De Schickler hot sich vor e paar Woche sei Enkelche bestellt,
der sollt mim Traktor enaus fahre zum kruppe sei Feld.
De Werner hot sich dann irgendwann gedacht,
gucksch emol ob der das aach richtich macht.
Korz druff hersche ne nur noch schenne,
weil der Bub mim Krupper uff anner Leits Äcker erum dut renne.
E paar Jugendliche hun sich e Heisje gebaut,
des hot in de Brätwiss durch die Bäämcher geschaut.
Doch einische Gerbacher hun sich beschwert iwwer des Haus,
domit stand de Buwe ihr Laacher schnell vorm Aus.
Die Kerlcher hun sich dann gedenkt mer sinn doch net bleed,
un korz druff e riese Bauwaa in ihrm Laacher steht.
Es hot net lang gedauert do hat die Kreisvewaltung geschrebb,
un hot ne e Räumungsfrischt vun e paar Woche gebb.
Die hun geschrebb, des wär kää Gäg,
des Ding misst uffem schnellschte Weg eweg.
Doch die Buwe sin hartnäckisch, die kriet mer dort net raus,
die bauen sich do hinne jetzt e niegel-nagel-neies Haus.
No dem Vorsjohr die Hochzet ausgefall war,
hot de Matthias jetzt endlich geheirat sei Patricia.
Aach die Diana un de Andreas, das wissen ihr sicherlich,
hun die Fliterwoche schunn hinner sich.
Uff dem weg bedank ich mich aach glei,
fer den vun eich gespendete Kaschte Wei.
De Alexander hot in Ruppezecke schunn emol fer unser Kerb trainiert,
un oschliessend ins Bürgerhaus gekotzt ganz ungeniert.
Peinlich war dem die Sach Sundags om Umzug schunn,
wie die Ruppezecker Leit sich no seim Wohlergehe erkunnischt hun.
Er hot sich nur gedenkt, was labern die Leit dann do fer mist,
vun Samstags Owends horrer nämlich nix meh gewisst.
Ä Sach gibts, die mag die Glanze Ingrid sehr,
un zwar iss das die Feierwehr.
Das se sich dodemit aach kann identifiziere,
dut die 112 ihr Nummerschild jetzt ziere.
Es Janetzkas die hatten e Pfau,
der hot Stimme gemacht, schlimmer wie wenn de Harry schlacht e Sau.
Das Vieh das war so doll,
dass die Leit de ganze Dag hun nur gescholl.
De Petry hot sich dann beim Ordnungsamt beschwert:
Das des Tier in Gerbach iwwerhaupt net wär begehrt!
Der hot dann e Anti-Pfau-Aktion gestart, des kann ich eich saa,
un hot Unnerschrifet in de ganz Hehestrooß sesammegetraa.
No e paar Daa war die Sach dann vun selbscht erum,
weil do Nachts emol de Fuchs is kumm.
Der hot Gebiss mit viel Geschick,
dem Vochel voll enin ins Knick.
Seit dem dut sich do owwe aach käner meh beschwere,
jetzt kammer nämlich nur noch die Gäße mäckere here.
Weil sei Roller kaputt war, un ehr wollt net in de Garde laafe,
dut sich de Dotzi e zwätes Audo fer in de Garde se fahre kaafe.
Vor drei Woche war in Gerbach Land unner,
weil do e Wolkebruch kam runner.
Aach die Schläfer-Junken konnt mer sieh do erum dann flitze,
awwer nur weil die Feierwehr mim Schlauch uff die dut spritze.
Iwwer e Badwann hummer jo vorhien schunn was geheert,
awwer net nur de Isolde iss so was bassert.
Trotzdem du mer in dere Familie bleiwe,
denn de Oli dut aach als emol so Dinger treiwe.
Er hot mit de Mira zusamme unner de Dusch gestann,
wahrscheinlich weil mer so e Haufe Wasser spare kann.
Was die zwää genau gemacht hun, soll uns jetzt net intressiere,
fakt iss dass de Oli bei dere Sach es Gleichgewicht dut veliere.
Mer hert ne nur noch kreiche: „Aaaah!“,
do warer rickwärts aus de Wann geschlaa.
Beim falle horrer noch, dass saa ich eich gewiss,
de Duschvorhang samt Halter abgeriss.
De Heinze Karl der hot demlescht vielleich geschaut,
dem hanse nämlich zwää Eimer Bohne aus em Garde geklaut.
Das mer unser Jungfüchs ach iwwerall als Männer dut akzeptiere,
hun die sich jetzt geloss e riese Ding uff de Arm tätowiere.
Awwer äns saa ich eich do howwe vun de Sprosse,
die Kerb kennen se als noch net richtich hochlewe losse.
Wer brummt neierdings mim Cabrio dorschs Ort?
Es iss de Boller Willi mit seim Promilletransport.
Unser neier Wehrführer der iss spitze,
der kennt sich aus mit Kreiselbumpe un annere Spritze.
Seit letscht Johr hot der bei de Feierwehr de owwerschte Rang,
un iss beim Insatz de Erscht on de Stang.
Mer wünschen em Jochen fer sei Amt alles Gute,
un dass es Martinshorn net all zu oft dut tute.
Ehr Leit uff de Strooß nemmen eich in acht,
die Hahne Manuela hot de Führerschei gemacht.
Großi Uffrechung gabs beim MGV im Ort,
vun zwää Lieder warn die Note fort.
Uff ämol hot mer geheert, e Schock fer All,
die Note wärn beime Großbrand de Flamme zu Opfer gefall.
Die Anke war fix un fertisch, sie hot ball geflennt,
wies gehäß hot, e Sänger hätt se äfach vebrennt.
Derjenich hot awwer gehandelt im Sinn vun de Sänger,
denn die wollten die Lieder singe nimmi länger.
Als Schutz vorm Wolkebruch hat de Theo e prima Idee,
er hot ins Gräwelche gestellt Bretter vun fünf Zentimeter heh.
Die Aktion hat awwer net werklich veel gebrung,
es Wasser iss grad so driwwer gesprung.
De MoccA den hummer geschickt no Schweden in die ferne,
dass die vun unsrer Kultur kennen aach noch was lerne.
E annere den hummer entsandt net ganz so weit fort,
de Uwe iss jetzt Kulturdezernent in unserm Nachbarort.
No dem die Landfraue die ganz Zeit kää erschte Vorstand hun gefunn,
hun jetzt glei vier Fraue uff ämol des Amt iwwernumm.
Seit die EU hot gekerzt die Subventione,
dut sich Neweerwerbslandwirtschaft kaum noch lohne.
Des hun aach die Gerbacher Feierowendbauere gecheckt,
die hun nämlich jetzt e nei Marktlück entdeckt.
Korzerhand wern tausende vun Euro investiert,
un 93 Rewesteck aus Rheihesse importiert.
Beim Harry im Garte, wo die Sunn de ganze Dag steht,
wurd die nei Hanglaach „Gerbacher Sauställche“ ogeleet.
Korz no dem der Wingert war bestellt,
hun se die nei Winzergenossenschaft HiClaBoGa ogemeld.
Hinner dere Abkürzung wers genau wisse will,
stehen die Nome Borckholder, Claaßen, Gaß un Hill.
Mer Kerweborsch hun uns schun iwwerleet,
ob sich der nei Jahrgang om Weistand gut vekaafe det.
Jetzt sieh ich do unne vier Leit die mich oguggen ganz scharf,
ich glab des häßt soviel wie, die Menge langt grad fer de Eigenbedarf.
Weil sich so veel Paare beim Kinnermache hun gebb mieh,
iss die Geburterate Dissjohr nochemol gestieh.
So veel Mütter sieht mer mit de Schees dorchs Ort jetzt renne,
das mer e ganzi Seit breichten fer dene ehr Nome se nenne.
De Chrissy, vielleicht wissen ehrs schon,
laaft ab un zu e Marathon.
Aach zum Nürburgringlauf isser Dissjohr gefahr,
un hot uff de Nordschleif em Nikki Lauda sei Beschtzeit geschlaa.
Es gibt Sänger beim MGV, das sollten ehr wisse,
die wo direkt vorm Ufftritt noch dusche misse.
De Wasem Oskar das iss so e Kandidat,
nimmt in Kerzenem in de Hall noch e Brausebad.
Während sich mit Stimmiwunge quälen die annere Kerle,
lässt der sich äfach es Wasser iwwer de Buckel perle.
Doch die Aktion lief net ganz glatt,
de Oskar hatt nämlich de Ozuch noch ogehatt.
Die Gaudi in de Umkleidekabin war riesegroß,
denn er war mim Kreiz on de Wasserkrone gestoß.
Schluss
Jetzt hun ich vorgeles schun so veel Scheiß,
un langsam werd mei Stimm aach leis.
Ich kann do howwe schun fascht nimmi steh,
un em Michael dem dut aach de Kopp schun weh.
Wie eh un jeh hummer mit voller Kraft,
an de Kerweredd un an unserm Waa geschaft.
Drumm hoff ich es hot eich all gefall,
un ehr ziehn nohm Kaffee on die Hall.
Dort würd ich mich freie wenn ich kennt genieße,
mim ä orrer anner an unserm Weistand e Sauere orrer Sieße.
Was ach net schade det,
wenn er kaafen e Kerweredd bei unsere Mäd.
Ich hoff ehr dun aach Nägschdjohr wirrer all do unne steh,
wenn e Annerer steit die Läder in die heh.
Ehr Jungfichs jetzt sein emol ganz Ohr,
ich traa eich noch ämol unser Schlachtruf vor.
DIE GERBACHER KERB SOLL LEWE
HOCH… HOCH… HOCH…