Ofang
Ach Gott, ach Gott was sein ich froh,
dass so veel Leit sein wirrer do.
Zur Kerb bei uns in klä Paris,
begrieß ich eich, ob alt orrer jung Gemies.
Ihr all sein do her kum fer se here,
was iwwers Johr so alles dut bassere.
Was e bissje schad iss fer uns all,
iss das dissjohr net so veel is vor gefall.
Trotzdem hun mer kenne wirrer e bissje was schreiwe,
iwwer das was die Gerbacher Leit dun treiwe.
Un wann sich äner dut droo stere,
was er kriet iwwer sich jetzt se here,
dut er hoffentlich net glei dezwische blerre,
orrer mich gar vun de Läder zerre.
Er derfen net jedes Wort uff die Goldwoo leh,
sunscht werd der Daach heit gar net schee.
Un wann mei Worte dun eich net immer erreiche,
dann hoff ich, ehr dun net glei eruffer kreische.
Awwer was soll ich eich do unne jetzt noch länger quele,
un eich lauter so bleed Zeich vezehle.
Bevor ich ofang, du ich nochemol no meim Gläsje schnabbe,
dass das met meiner Redd dut besser klappe.
Kerwevadder
Se erscht muß ich noch was saa in eigener Sache,
un des iss fer mich jetzt gar net zum lache.
Ich hab eich letschtjohr misse belie,
denn ich hab eich verzehlt, ihr den mich do howwe nimmi sieh.
Denn de Kerwevadder mache se derfe, do iss mer druf stolz,
awwer zwo vun unsere Kerweborsch hun glab ich e Kopp aus Holz.
Zwo Kerweborsch huun letschtjor behaupt sie wolle die Kerweredd halle,
awwer jetzt du doch mei Stimm zu eich enunner schalle.
Denn de äne do unne der arme Tropp,
durft net entscheide no seim Kopp.
Un de anner hot ach die Klapp groß uff geriss,
jetzt steht er do unne un hot immer noch schiss.
Dene zwo do unne det nämlich so die Klammer geh,
wenn se missten do howwe uff de Läder steh.
Denn die zwo feige Mimose,
scheißen sich jo vor Angscht in die Hose.
Drum muß ich alder Sack noch emol die Kerweredd halle,
un du bestimmt noch vor altersschwäch vun de Läder rummer falle.
Awwer fer negschtjor do hun mer e ganz neije Mann,
dann iss nämlich es Koche ehr Alexander dran.
Die Zwo die dun die Kerweborsch zu narre mache,
das schun die ganze Leit dun iwwer uns lache.
Un weil die zwo hun bestimmt kää reue un sin heit Owend trotzdem blau,
Krien die zwo Nare jetzt vun mir e dreifach dunnerndes Hellau… !!!
Un das ihr wern jetzt ned ach noch zu Kerwemääd dekradiert,
wird sich beim Kerb hoch lewe losse net blamiert.
Erster Schuldag
Vor 5 Woche war´n die Ferie erum,
un e haufe Kinner sinn nei in die Schul kumm.
Am erste Schuldag, des is jo klar,
iss Gottesdienst , wie jedes Jahr.
Um halb 8 in die Schul, um 8 war Kerch,
des war schun Streß, fer die kläne Borsch.
Es Gotteshaus war voll, die Pfarrer froh,
nur e Organist war käner do.
Deshalb froht de Pfarrer Brenner, der gute Mann,
ob vielleicht jemand Orgel spiele kann.
Er hot aach werklich jemand gefunn,
die Ulrike Melzer hat des dann iwwernumm.
Der Gottesdienst verlief dann ohne Zwischefäll,
bis zu äner gewisse Stell.
Mer hat grad e Lied ferdich gesung,
do war´n die zwä Parrer äfach veschwunn.
Es war iwwerhaupt net zu versteh,
jedenfalls, am Gesang oder an de Organistin hot´s net gelää.
Wie geht´s jetzt weiter, ich wäs´es net,
de Schulleiter Thom hot die Situation dann gerett.
Der hat nämlich erklärt, mit ruhigem Wort,
die Kerch is scheins aus, die Parrer sinn fort.
Die Zwää sinn ab dorch de Seideausgang,
sunscht hätt se die Oma Lu bestimmt abgefang.
Die hätt se so net gehe geloss,
weil die wäs, die Kerch werd mim Sege beschloss.
Feierwehrinsatz
Als im Summer die Feuerwehrsiren dut erklinge,
do siehsche e paar Feuerwehrmänner iwwer die Gasse springe.
Doch um dann ausserücke musst mehr ins Feuerwerhaus erinn,
bloß ohne Schlüssel, kummt mer do halt net eninn.
Als se dann no einiger Zeit e Schlüssel hun besorscht,
hun se serscht emol am Funkgerät gehorscht.
Doch sie konnte net eraus finne wo’s brennt,
weil sich käner mit dem Funk-Dings-Bums hot aus gekennt.
Em Komander sei Fraa dut dann ans Feuerwehrhaus flitze,
un verklickert dene Jungs, wo se hun hie se spritze.
E Acker det uffem Schmalfeld brenne,
do hatten se schun Angscht sie misste do enuffer renne.
Denn wie’s halt emol so iss,
konnt dann käner den Unimog enuff fahre uff die Wiss.
Wie dann mim Klaus doch noch e Fahrer war gefunn,
sin se mit Martinshorn und Blaulicht de Berg enuff verschwunn.
Uff em Schmalfeld o kumm sin dann all dorschenanner gerennt,
weil sich käner mit de Bumb hot richtisch ausgekennt.
Die Bumb hot mer dann doch noch in Gang gebrung,
awwer nor weil dass äner vun de Katzebacher hat iwwernum.
De Alexander hot dann es Wasser uff’s Feier gelatzt,
do issem dann nadeerlich ach noch de Schlauch geplatzt.
Unser Feuerwehrjungs die waren an dem Dach werklich Top,
denn e Bauer hot am Schluß mim Pulfaß erledischt dene ehr Job.
Un wollener wisse was die Moral iss vun dere Geschicht,
Feuerwehranalphabetismus iss net nur e Gerüscht.
Strooßekampf
Uff ä Thema hun bestimmt schun einiche vun eich gewart,
obwohl, mir hättens uns viel liewer erspart.
Denn dodevor ach noch Papier zu investiere,
wo doch mir Gerbacher dun die Leit iwwerhaupt net intressiere.
E nei Strooß hatten se vor Johre kriet, die Bewohner hun gestrahlt,
denn die Gerbacher hun e Dääl dodevun mitbezahlt.
Doch deletscht hat so äner aus Rockehause,
dene in de Kopp gesetzt so blede Flause.
Es wär so, laut einem richterliche Entscheid,
dass de Schneeberg zu weit vum Ort wegleit.
Deswee breichten die fer de Ausbau vun de Gerbacher Gasse,
nix se bezahle aus de eichene Kasse.
Stellvetretend fer alle hun dann zwä Leit geklaat,
un im Recht wärn se ach, hot de Richter gesaat.
Ach e paar Altheefer warn froh iwwer den Beschluss,
doch fer die isser jo wohl no hinne losgang, der Schuss.
Die sollen nämlich ball krie fer ehr Strooß neie Teer,
doch vun de Gerbacher Bürger gibts dodevor nix mehr.
Einiche Schneebeier hun wenigschtens ihr Gerechtigkeitssinn bewiss,
un das vun de Gerbacher erhaltene Geld wirrer serick iwwerwiss.
Wann das jetzt alle mache däten, was wär das schää,
annerefalls stellen die Kerweborsch folgende Otrach bei de Gemää.
Mir hätten gern die Daubenheid im Gerbacher Land,
dodevor gewwe mer de Schneeberg in Kriesfeller Hand.
Die wär mer dann los, dort is eh nix meh se hole,
dodevor kennt mer mit de Windräder vediene e Haufe Kohle.
Doch jetzt losse mer die „arme“ Schneebeier in Ruh,
un wennen uns wirrer de ogenehme Seite vun de Kerweredd zu.
Frauenpower
Vor me Johr war´s noch ruhig, drowwe uff em Höheweg,
do sah mer nor Reh, Hase un de Strasser Manfred.
Doch diese Idylle is jetzt veschwunn,
seit dort die Gerbacher Fraue laafen erumm.
Aus Fitnessgründe hun die nämlich beschloss,
schluss mit Trägheit, ab jetzt werd geloff.
Die mänen´s ernst, des iss kä Bluff,
außer Sunndags gehn die jeden Dag do enuff.
Eigentlich laafen die net, die walken do erum,
weil des macht fit un hält ach jung.
Walking müssen ehr eich vorstelle ihr Leit,
wie e halb Stunn spaziere, hosch awwer nor e verdel Stunn Zeit.
Nordic Walking iss dem sehr verwand,
die laafen awwer mit Skischdägge in de Hand.
Wenn de so äni siehsch, denksche des iss e Bless,
die hot jo vor lauder lauder, ihr Ski vegess.
Die Gerbacher Fraue sein Ausstaffiert, do wersche blass,
nur die Gummistiwwel sinn net vun ADIDAS.
Wann die „Alt Hohl“ enuff nass is, es is net geloh,
wern wie bei de Formel 1, statt Regenreife, Gummistiwwel uffgezoh.
Die Laafschuh kummen erst on die Füß, wenn mer uff de Teerstroß ogelangt,
dann wern die Gummistiwwel in e Plastiktutt vebannt.
De Weber Werner denkt schunn mit Verdruss,
soviel Ehrgeiz bräuchten unser Fußballer vum TuS.
Mit so me starke Wille un so veel Engagement,
treten die ruckzuck widder in de Bezirksklass o.
Amokfahrt
Es folgende Stick hot uns e Fraa beschert,
vun dere hot mer in de Kerweredd fascht noch nie was geheert.
Es war Januar un de Michael hot grad vorm Computer gehang,
wie uff ämol de Bilschirm se wackele hot ogefang.
Doch das Gewackel , ehr Leit, so stehts in meim Bericht,
war schun fascht es Enn vun dere Geschicht.
Jetzt awwer vun vorne, dasses jeder vesteht,
wie gesaat, es war Januar un owends schun spät.
Do dut unser Hauptperson mim Audo bei die Heinze Gretel schnerre,
um schnell noch die letschte Neiigkeite loszuwerre.
Wie se dann mit vezehle fertisch war,
wär se gern gleich widder häm gefahr.
Sie iss dann ingesteh un hot de Rickwärtsgang ingeleet,
denn sie hatt beschloss: „Do im Hof werd jetzt glei gedreht.“
Beim Wenne hatt se dann korzerhand emol Gas un Brems vedauscht,
un iss mit hohem Tempo dorschs Heinze Hof gerauscht.
Wann die schnell rickwärts fahre will hot jo käner was degee,
nor es Heinze hun noch e Schopp im Hof drin steh.
Das Manöver war dann ach werklich super geloff,
sie hatt dene Schopp mim Honda mittich getroff.
Außerdem hatt se ach noch vewischt es Uhle Scheier un es Kannelrohr,
deswee hatt jo ach gewackelt em Michael sei Monitor.
Vor lauter Schreck hot die Fraa schnell de erschte Gang eningemacht,
hot Gas gebb un schun hots nochemol gekracht.
Es hääßt jo ach oft, dass ä Uglick selten alää bassiert,
do hot die Leni Noch em Michael sei Audo demoliert.
Erscht om nägschte Moje hot mer das voll Ausmaß vun der Katastroph gesieh,
die Schoppmauer war veschob, es Audo un ach es Kannelrohr warn hie.
Doch glicklicherweis hot die Vesicherung den Schade komplett iwwernumm,
so sinns Heinze zu me neie Schopp unds Uhle zu me neie Wohnhaus kumm.
De Kalkstreuer
Bei de Verleihung zum Titel “Bauer des Jahres 2003“,
sinn zwää Gerbacher Jung-Bauere ganz vorne debei.
Awwer de Agrar-Champions-Titel den kriet mer nur verlieh,
wammer sich beim Acker inkalken gebt richtich viel Mieh.
Mer dut sich deshalb e Kalkstreuer leihe,
mit so me Ding iss de Acker äfacher zu bestreie.
Aach e größerer Bulldog hot mer sich ausgelieh,
weil dene Männer ihr Traktor das Ding konnt net zieh.
Wie die Beladung vun Kalkstreuer dann ferdich war,
sein die mit Ihrm Gefährt richtung Acker gefahr.
Dort okumm säät de Ä, no meim eigene Bemesse,
isses veel zu Nass, das kansche Heit vegesse.
De Anner saat dann, dass dut schun geh,
mer missen halt nor e gresere Gang inleh.
Er dut dann mit Vollgas iwwer de Acker flitze,
do fängt der Kalkstreuer schun richtich o se schwitze.
Uff ämol war im Acker e diefes Loch,
do iss on dem Hänger die Achs abgebroch.
Jetzt hot mer gestann vor me ganz neie Problem,
wie ziehsche den Karre ohne Achs widder Häm.
Unser Mann dut die Situation ach glei iwwerblicke,
un will das Gerät direkt uffem Acker widder flicke.
Doch ohne Strom dut’s Schweiße so schlecht klabbe,
deshalb sieht mer de Helmut im ganze Ort rum dabbe.
Denn er mußt sich e Notstromaggregat besoje,
sunscht leit der Kalkstreuer dort noch iwwermoje.
Awwer fer uffem Acker se behewe den Schade,
hot mer misse sechs Tonne Kalk mit de Hand ablade.
Un weil sich de Dembi allä het gescheppt de Wolf,
hot em sei Mitstreiter Ogalala halt debei geholf.
Sie du dass Ding dann provisorisch samme schweiße,
un e paar Daa später hun se uff de Äcker widder gezoo ihr Kreise.
Korznorichte
On dere Stell, läs ich jetzt vor,
die Korznorichte, wie jedes Johr.
De Bernd un die Irene die hun emol geschluckt,
wie se demletscht uff ihr Delefonrechnung hun geguckt.
De Grund fer die Sach, ja das iss klar,
is dass de Alexander fer 400 Euro im Internet war.
Alexander, du brauch jetzt gar net se werre rot,
denn uff was fer äner Seit de warsch, hosche uns noch net verot.
Vorsjohr in de Kerweredd, do hummer Bericht,
dass de Werner mim Traktor zeh klääne Bäämscher hot venicht.
Dissjohr do horrer de Höherekord vun vorsjohr geschlaa,
un hot e drei Meter hohe Bääm mim Buldog sesamme gefahr.
Mit de Gerbacher Landwirtschaft gehts jetzt steil berguff,
denn es Janetzkas hun gemacht e Bauerei jetzt uff.
Gäse, Pute, Hinkel un aach Schoof,
find mer bei dene do newedroo im Hof.
Nur mit de Vemehrung vun de Hinkel duts net funktioniere,
weil den Gockel die Hinkel dun äfach net intressiere.
Un da der Gockel iss wor nimmi geil,
isser kumm beim Theo unners Beil.
Aach iwwer dene Ihr Wutze gibts e klänie Geschicht,
die hatten im Summer Sunnebrand, so wurds uns bericht.
Un dass dene so was nimmi bassiert,
hot die Anke die Wutze mit Sunnecreme ingeschmiert.
Die bescht Feuerwehrtruppe im Land, wollt mer finne e raus,
deshalb traat mer om Tag der offenen Tür e Feuerwehrwettkampf aus.
Un die Gerbacher Jungfeuerwehrmänner hätten eigentlich gewunn,
hänn die Delwer net e Weg zum bescheiße gefunn.
Awwer unser Jungs die konnten des grad noch so verschmerze,
denn sie warn eindeutisch die Sieger der Herze.
Die Kriminalitätsrate wurd fer Disjohr schun widder versaut,
denn so e paar Schurke hun Radios un e Laptop aus Autos geklaut.
Die Autobesitzer warn do driwwer gar net froh,
denn die Penner hun aach noch die halb Karosserie verboo.
Unser neie Kerwemääd die sin jo ganz schää engagiert,
un an de erscht Sitzung hun se sich besonners fer de Suff intressiert.
Die Manuela war vun dere Sitzung jo so entzückt,
do hot se die Mauer grad emol mit Essensrückstände bestückt.
De Terroriums macht selbscht vor Gerbach net halt,
denn so e paar Dolle schlaan mitte im Ort zu mit aller Gewalt.
De Weihnachtsbääm an de Mauer hun se eraus geriß,
un hun ne ganz äfach uff die Gass geschmiß.
Awwer in Werklichkeit wars doch kää so wilde Truppe,
denn als Übeltäter dun sich e paar Delwer Fußballer entpuppe.
Aus lauter Langeweile,
dut de Kalli jetzt Golfunnericht erteile.
Jetzt fron ehr eich bestimmt, wo das in Gerbach geht,
de Maué Hermann hot do hinne extra e 18 Loch Golfplatz ogeleht.
Das die Plänzjer dehäm dun net verblie,
missen se regelmäßig Wasser krie.
Un weil de Dotzi dodevor es Wasser holt on de Bach,
horrer demletsch mim Roller e Abschlaach gemach.
Mer hun awwer noch was iwwer den geschrebb,
der hot nämlich noch so e Ding getrebb.
Dass die Sun scheint net so arisch uff sei Planze druff,
spannt der in seim Garde jetzt e Sunnescherm uff.
Ehr Gerbacher Leit, jetzt gebben e mol gut Acht,
denn ich hab eich e Warnung mitgebracht.
Denn wer de Fuß vor die Deer dut setze,
der muß jetzt uffbasse, dass er net geriss wird in dausend Fetze.
Denn die Charlotte un die Julia, die zwää flotte Biene,
die derfen jetzt aach e Kraftfahrzeug bediene.
De Schmidti der is demletscht wor ganz schää blaß,
wie sich de Wewwer Walter mit dem erlaubt hot e klääner Spaß.
Denn de Schmidt hot do iwwe beim Bernd gestann un hot gelacht,
do hot de Walter mim Traktor grad emol e Schlenker gemacht.
Dodebei iss der dann ganz ungewollt,
em Schmidti iwwer die Fieß gerollt.
Der hot dann gekrisch, du hosch se nimmi all,
do issem die Zigar aach noch aus de Gosch gefall.
Weil de MoccA angeblich so laut Musik hert,
hot sich newedroo die Schidhornsen bei de Polizei beschwert.
Grad die brauch sich iwwer annere se beschweere,
die misst sich selbscht als emol do rum plerre here.
Die Kicker vum TuS kennen disjohr emol ausprobiere,
wies so iss in de B-Klass zu verliere.
Awwer mer hoffen jo sie stein glei widder uff,
denn dann machen mer mit dene richtich äner druff.
Wie de Firma Juwi ihr 100. Windrad uff de Schneeberg iss kumm,
hun e paar Männer das riese Ding in Betrieb genumm.
Uff ämol hots gerappelt un gescheppert, es war nimmi schää,
do hot das Windrad grad widder uff em Buckel gelää.
Käner wäs warum die Windmiehl umgefall iss,
awwer ich glab jo, die hat nur vorm Schaffe schiss.
E paar Ludwigshäfer Määd wollten de Kerwespruch ausewendich lerne,
un jetzt wolle mer mol sieh ob se ne ach werklich kenne.
Deshalb lossen se die Kerb jetzt emol hochlebe,
dass de ganze Schulhof fängt o zu bebe.
Fer die Gerbacher Leit isses passé,
umsunscht do owwe uff de Campingplatz se geh.
Denn wenn mer do hie wollen do missen mir,
bezahle e Besuchergebiehr.
Die Härte iss nur was mache die schlimme,
jetzt derfen die Gerbacher aach dort nimmi schwimme.
Wann das so weiter geht, das werd mer dann sieh,
dann gehn mer grad iwwerhaupt nimmi hie.
De TuS hat im Juni e groß Jubelfescht,
un hot fer die Party aach ganz schää geblecht.
50 Johr Tus, hun se drei Daa gefeiert,
als Geschenk gabs e paar neie Bäll, denn die alte warn veeiert.
Egal was ner denken, Ihr Leit es iss wohr,
mer frein uns aach heit schunn uff negschte 50 Johr.
Die Marianne iss vun Lautre hääm kumm,
un hot fer se schlofe e Abstecher uff die Couch genumm.
De Daniel wollt se wecke un iss zu rer gehecht,
do spricht se bloß die Worte: De Korb iss noch net geflecht.
De Daniel voll Uschuld: Was hun ich vebroch?
Do druff kreischt se nor noch: Du hosch mers vesproch!
Du wollsch mer beim Korb helfe, du wäschs ganz genau,
er denkt sich dann bloß: Was will diese Frau?
Er is total ferdisch, un wäs net was bassiert,
dodebei hat sei Alt im Schlof nor fantasiert.
De Klaus un de Helmut die huns jetzt ganz schää schwer,
die sein jetzt staatlich geprüfte Diplom-Spritze-Ingeneer.
In Gerbach gibt’s jetzt e paar neie Attraktione,
deshalb dut sich e Besuch im zoologischer Gade lohne.
Denn im Wilfred seim Garde werd’s äm Angscht un Bange,
weil dort lewen jetzt wilde Fisch, Frösch un ach Schlange.
Ganz ubekümmert un äfach so,
werft de Werner vun de Scheier e paar Bose Stroh.
Er zählt dann äns, zwää, Feuer frei,
do unne do werd jo schunn käner sei.
Die Sach war dann doch e bisje schief geloff,
mit dem letschte Bose harrer de Kurt getroff.
Awwer ä Uglick kummt jo selten allää, ich saas eich all,
do is em Kurt sei Gebiss aach noch ins Stroh gefall.
Mer hot gesucht, hots awwer net gefunn,
das Ding war wie vum Erdbodde veschwunn.
Wo war nor das Gebiss, jetzt rooten emo,
ei die Wutz newedroo, die hats glawisch ogezoo.
De Schmidti der dut als probiere,
em Bernd seine Hund beisebringe gute maniere.
Die kreischerei dut mer als bis uff de Sportplatz here,
awwer die zwää Hund, die dun sich net droo steere.
Mondags moins wollt de Fabi schnell vun Dehääm fort,
do rast er mit seim Golfsche Richtung Dielkerch durchs Ort.
In Gedanke an die „Lehrer un an die Penne“,
dut er mit 100 in die Wildsaukurve renne.
Die Fliehkraft, die war awwer viel zu groß,
do is er mim VW an die Leitplanke gestoß.
Da die Leitplank hot net gebt no,
is er gäniwwer de Hang enuff gefloh.
Ich wääß Fabi, das klingt jetzt e bissje banal,
awwer das Ding in de Mitt, das is es Bremspedal.
De Alexander iss unser beschder Feuerwehrmann,
denn er iss de änsichte, der e Feuer auskotze kann.
On de Hochzet e Stamm dorch se sää, das war em Uwe so bleed,
deswee hot em de Jochen e Motorsää hinner die Kerch geleet.
Die Sää hot mer awwer noch rechtzeitig endeckt,
un de MoccA hot das Ding dann glei emol vesteckt.
De Uwe un die Nicole sinn dann doch noch ins schwitze kumm,
sie hun dann halt doch die Handsää genumm.
Wie de Edwin im Winter uff em Höheweg war,
isser mit seim Audo iwwers Glatteis gefahr.
Uff emol iss die Karre fortgerutsch, es war nimmi schää,
do hot em Edwin sei Astra im Grawe gelää.
Do owwe uffem Hewwel, do soll entstehe e Haus,
das Ding sieht awwer eher wie e Burgruin aus.
Die Planung die war scheinbar geloff e bissje dumm,
denn on dem Objekt iss alles schebb un krumm.
Aach de Schickler hat Stress mit dene, das hot ne awwer net gesteert,
do horrer grad de Schuttkontainer vor die Hausdeer geleert.
Ob das Haus noch fertig gebaut werd, un wenn ja, wann?
dass iss die änzicht Frag die mer sich do noch stelle kann.
Schluss
Weil ich jetzt ball kää Wort meh rausbringe du,
geb ich langsam emol Ruh.
Ich hoff es hot eich e bisje gefall,
un mer siehn uns negschtjohr wirrer all.
Zum Schluß sei gesaat, ehr liewe Leit,
geeiert werd sich net, mer hatten doch all unser Freid.
Ebbes muß mer doch en die Kerweredd mache,
dass Ihr do unne hun aach was se lache.
Mer hoffen, dass ner jetzt net glei fort laafen,
sondern seerscht noch e Kerweredd bei uns kaafen.
Eich all wünsch ich jetzt noch e scheenes Fescht,
un bedank mich bei eich, dass er warn unser Gäscht.
Bevor ich jetzt mei Buch du schließe,
du ich nochemol mei Brand begieße.
Un dass die Kerb un de Schlachtruf net unnergeht,
rieft jetzt jeder der do unne steht:
Die Gerbacher Kerb soll lewe
Hoch... Hoch... Hoch...