Politschach fordert Bauernopfer!
Sein gegrießt do unne ehr liewe Leit,
zur Kerb in unserm Örtche heit.
Bei Bier un Wei un dumm Gebabbel,
in Klä Paris, do on de Appel.
Wie jedes Johr zur Herbschteszeit,
isses wirrer mol soweit.
Alles dut em Ort enkehre,
fer unser Kerweredd se here.
Iwwers Johr hummer wirrer was sammegetraa,
vun manchem Kind, Mann un Fraa.
Ich hoff es dut sich käner beschwere,
wann er sei Nome in de Kerweredd dut here.
Auserdem hoff ich ehr sein mer net bees,
wann ich manchmol bin e bissje nervees.
Schunn jetzt kann ich fascht nix meh lese, es iss nimmi schää,
so arisch zittern em Tobias do unne die Bää.
Awwer was soll ich eich do unne jetzt noch länger quele,
un eich lauter unetisch Zeich vezehle.
Doch bevor ich in mei Redd instei,
nemm ich noch e Schluck vum Gläsje Wei.
Treib Sport, un bleib im Lewe fit,
ach die Gerbacher Rentner machen do mit.
Gymnastik, Radele un ach Schwimme,
so dun sich die Seniore trimme.
Om e Summerowend es Wetter war schee,
do iss e klä Grippche mol widder uffs Rad gestee.
Weil mer awwer net so schwitze wollt,
es mer locker leicht es Dal enunnergerollt.
Die erschte paar Kilometer isses super geloff,
kä Leitplanke un kä Schlagloch hatt mer getroff.
Om Freyhof hots Schicksal awwer sei Lauf genum,
ä Fraa war dort mim Rad vun de Strooß abkumm.
Beim Vesuch vun de Perm uff die Fahrbahn sericksekehre,
war das Uglick nimmi absewehre.
Es poltert, es scheppert, es rappelt, es kracht,
do hatt die Fraa Bekanntschaft mim Strooßebelaach gemacht.
Doch ä Uglick, wie sät mer so schää,
kimmt ganz selten jo allää.
E anner Fraa hatt de Sicherheitsabstand net ingehall,
un is korzerhand iwwer die anner driwwergefall.
Do hun se jetzt gelää die zwää Gerbacher Dame,
Arme un Bää veknot zwische Gawwel un Rahme.
Die annere hun gemänt sie breichten die Feierwehr,
fer die zwä se befreie mit de Rettungscher.
Doch nodem se hatten iwwerleet e korzi Zeit,
hun se se doch selbscht aus dere missliche Lage bereit.
Käm vun dene zwä is was bassiert, das freit uns umso mehner,
weder de Hannelore Mai noch de Ingrid Hener.
Un Frau Mai, dun se beim nägschte mol Fahre,
mindeschtens drei Radlänge Sicherheitsabstand wahre.
Als nägschtes lossen mich berichte,
aus de Schulstrooß noch e klää Geschichte.
Ich glab so oft in äm änziche Johr,
kam noch kä Familie in de Kerweredd vor.
Uff dere Seit gehts um die Vorbereitung fer ihr Hochzetsfeier,
wie jeder wäß, so e Fescht is deier.
Doch alles Jammere hot kää nutze,
vor dem Fescht, do muß mer ach es Audo butze.
Er sät Fraa, fahr noch schnell zum Wäsche bei de Opel Wolf,
nemm awwer de Mercedes, net de Golf.
Sie iss dann ach schnell no Rockehause geflitzt,
daß de Benz fer die Hochzet wirrer blitzt.
Beim Wolf bestellt se es Wäschprogramm, es große,
zwämol berschte un ach trockeblose.
Wie se dann in die Wascholach so fährt,
denkt se sich, daß es jo inne ach emol gebutzt gehert.
Noch korz werd sich dann iwwerleet,
wie das dann jetzt om beschte geht,
daß mer inne un auße dann de Dreck entferne,
gewwen acht, jetzt kennen er noch was lerne.
Uff so e Idee, do kämen er jo all net druff,
om beschte gehts wanns Schiewedach iss uff.
Dann werd jo alles naß, san ehr bestimmt jetzt glei,
awwer nä, beim Programm wars trockne doch debei.
Doch trotzt dem Trockne warn die Sitz noch naß,
ich glab die Sandra war noch nie so blaß.
Em Andi hots anscheinend wenich ausgemacht,
der hot nämlich dehäm gestann un nor noch gelacht.
Awwer zu de Hochzet konnten se net in ihrm Daimler hocke,
der war nämlich immer noch net richtich trocke.
Ach, un Sandra vegess net bei nägschte Mol die Innewäsch osemelle,
denn es Cockpitspray das musche extra bestelle.
Weil merr uffem Sportplatz kä Linie me hott gesieh,
muscht merr vor Rundebeginn halt neie zieh.
De TuS hat ferr den Job ach glei äner gefunn,
de Mocca hot des freiwillich iwwernumm.
Vun Vereinsseite war mer arisch froh,
denn no zwä Daa hat der schunn alle Linie gezoo.
Vun drowwe vum Hewwel sah des prima aus,
doch vun Nahem betracht, oh Schreck, oh Graus.
De Platz ess greßer, des macht jo noch Sinn,
nor die Eckfähncher stehn jetzt halt mitte drinn.
Ach die Dore stehn nimmi om Rand,
Dor-Aus ess jetzt hinne on de Wand.
Prompt gings erschde Spiel in die Hoss,
weil die Außeveteidicher die Außestürmer hunn auße vebei geloss.
Es zwätte Heimspiel hann se gewunn, weil sie hann begriff,
dass de Platz jetzt e paar Meter bräter iss.
Dem TuS geb ich noch folgenden Tipp,
denken vorm nägschde Abzeichne e bissje mit.
Die Trainingsdore an de Seitelinie müssen weg, ich saas eich ganz forsch,
sunscht zieht der die Mittellinie dorsch die Elfmeterpunkte dorsch.
Vorsjohr om Kerwemontag wars soweit,
dodruff hatt sich de MGV schun seit Woche gefreit.
Om fünf Uhr hot mer sich im Ort getroff, mit Träne in de Aa,
fer mim Bus se fahre on de Fliecher Richtung Afrika.
Dort hun sich ach zugetraa e paar schäne Geschichte,
un vun dene will ich eich heit emol berichte.
Em Andi sei Sandra konnt die Hoor net trocke blose,
weil unser Stecker bassen net in dere ehr Dose.
De Andi hatt die Situation dann awwer glei gerett,
un Korzerhand om Hoteleigene Wasserkocher Stecker abgeschnett.
Den dut er dann schnell on de Fön ddromontiere,
daß die Sandra konnt sich fers Nachtlewe frisiere.
Ja, ja, ganz annerscht als wie die Buwe,
hun die Mäd debei e Haufe Deesjer un ach Tuwe.
Bei so veel Kosmetik kanns dann schnell bassiere,
daß mer in seim Zeich de Iwwerblick dut veliere.
De Diana sei Uordnung hot ach fer die Kerweredd genutzt,
das hatt sich nämlich met Gesichtscreme die Zäh gebutzt.
Fer unser Zoologe aus de Hehestrooß,
war das Erlebnis Afrika äfach riesegroß.
Jedes Dierche was do uffem Bodde krawwelt,
odder in de Hecke zawwelt,
werd genauschtens inspiziert,
un bei Bedarf glei imme Saftgläsje deponiert.
De Jack harrer hämzus mit dene Dinger voll,
un marschiert ganz ungeniert in Frankfurt dorsch de Zoll.
So, das wars, was ich iwwer Afrika hatt doo,
wer meh wisse will, kann gern die Mitreisende froo.
Politschach fordert Bauernopfer!
Durch Fußball un Camping iss Gerbach bekannt,
doch die neischt Attraktion iss einmalich em ganze Land.
Vekehrsinsle gebts viel, mol klä, mol groß,
awwer nirchens so äni wie in de Luitpoldstroß.
Mer find se normal in Stroßemitte,
doch net so die do driwwe.
Ganz abnormal leit die om Rand,
un werd deshalb ach Halbinsel genannt.
Besitzer is ach net de Staat,
nä, die do iss ganz privat.
Die Fläch wollt äner vun de Gemä serick,
des hot dem awwer politisch gebroch es Genick.
Ich nenn kä Nome, die sinn bekannt,
un deswee ach vun de Rothäute vebannt.
Awwer net nor do iwwe dun so Sache bassere,
ach aus annere Strooße dut mer Geschichte here.
Daß es ach drunne im Gässje sieht aus widder schee,
sein dort Leit debei, sich e Vorgärtche oselee.
Seit einicher Zeit kammer dort seh,
daß e neier Bääm direkt vorm Wohnstuwwefenschter dut steh.
Jetzt denken ehr bestimmt, der is doch meschugge,
wie will dann der in e paar Johr noch dorch sei Fenschder gugge?
Dodriwwer allää kennt mer jo jetzt schun lache,
awwer mir dun uns iwwer was ganz anneres Soje mache.
Aus sicherer Quelle hummer nämlich erfahr,
daß genau unner dem Bääm de Oschluß fer sei Abwasser war.
Die Folgerung dodraus, ich redd jetzt kää Stuß,
wär doch, daß der fer oseschließe den Bääm widder ausmache muß.
Odder, so kimmts äm doch dann gleich in de Sinn,
laaft dem sei Brie am Enn schun in de Kanal eninn?
Wanns so wär, dann wärs doch allerhand,
hun manche Leit vielleicht Sonderrechte in unserm Land?
Dann hert dene doch, das muß ich jetzt emol so saa,
normalerweis no Strich un Fade de Arsch veschlaa.
Weil fer manche de letschte Kerwemontag war ausgefall,
hun die den Dach schunn e Woch vorher abgehall.
In de Brick no de Singstunn, do wars bassiert,
do hun die Jungs fer die Kerb emol ostannisch trainiert.
Ganz harmlos hatts ogefang mit Schorle vum Wei,
do war die Meute noch frisch, fromm, fröhlich debei.
Äner hot iwwerbrung die fröhliche Kunde,
de Lehrvetraach is unnerschrebb, mach glei noch e Runde.
No fünf Schorle un sechs mol pisse,
hot mer vun Wei uff Willi umsteie misse.
Un wie de Hals no drei Willis so arisch hot gebrennt,
kimmt de nägschte glei mi rer Rund Jacky Cola ogerennt.
Nom vierte vun dene Dinger, hot de Matthias abgewinkt,
un hot sich aus dere Party ausgeklinkt.
Der hot sich geschämt, weil das fer den war schwer,
denn sowas gehert sich net fer e Inscheneer.
Bevor die annere drei ihr Geldbeitel hun gezickt,
hun die seerscht noch drei so Apperate enunnergeschlickt.
De ä hot gesaat, weil er war so voll,
daß die Wertin es Wechselgeld fer die Kerb behalle soll.
Nodem die annere drei ihr Zech bezahlt hun,
sin se dann laut singend Richtung Hewwel veschwunn.
Das „Hey Baby“ hot nimmand gesteert,
nor de Kerwevadder hots im Bett geheert.
Die drei die schloofen im selwe Haus,
un nachts steht de Uwe vor de Deer un kotzt enaus.
Un weil die hatten so arisch gesoff,
hot er de Briefkaschde un ach die Blumetöpp getroff.
Die Waltraud un die Nicole die hun ne gehall,
sunscht wär er die Trepp enunner gefall.
De Manuel der hatt ach ganz schee geprotzt,
der hot vor Bett gelää, un hot enin gekotzt.
De Dritte vun dene den du mer net nenne,
sunscht dut de Günter so arisch mit uns schenne.
Un die Moral vun der Geschicht:
Alkohol vetreet mer odder nicht.
So, jetzt will ich eich emol saa,
was sich uff em unnere Hewwel hot zugetraa.
Lange Johre hummer die Fraa in Ruh geloss,
doch diesmol hot se de Vool wirrer abgeschoss.
Beim Deer zumache vun auße hot se net bedenkt,
daß de Schlissel noch inne om Hooge hängt.
Jetzt hot se do gestann, drauß uff de Strooß,
wie ehr eich denke kennen war dort de Deiwel los.
De Heinze Uwe iss grad de Hewwel enunner gedappt,
den hot se sich dann gleich emol geschmappt.
Wie der gesaat hot, das er do nix mache kennt,
hot se seerscht emol ihr Mann sesamme geschennt.
Willi du alder Depp jetzt stei halt emol uff,
un drick nor korz vun inne, uff die Deerschlenk druff.
Der hot dann gesaat das er das net kann,
un so hot seit Fraa immer noch vor de Hausdeer gestann.
Uff jeden Fall hot se dann in ihrer Not,
es Multitalent un Chefpolier, de Uhle Otmar gefroot.
Der hot sich die Sach dann glei ogeguckt,
un no korzen iwwerlee nur mit de Schultere gezuckt.
Weil nirgends e Fenschter uff is, dut der dann saa,
es bleibt uns nix iwwerisch, wie e Scheib inseschlaa.
Um Himmels Wille, sat se, das dut net geh,
er sollt sich gefälligst was anneres iwwerlee.
Alla gut, dann machen mers halt so,
un stellen seerscht emol om Haus e Läder oo.
Systematisch hot de Otmar dann e Plon ausgeheckt,
un korz denoo, war e Dääl vum Dach abgedeckt.
Gleich druff wars dann ach schun so weit,
do war die Lydia vun Ihrm Leide befreit.
Jetzt konnt se ach glei in die Schlofstubb renne,
fer den arme Willi sesamme se schenne.
Dem wars bestimmt ganz recht, daß die Deer war zu,
do harrer wenigschtens emol fer e Stunn sei Ruh.
No all dene lange Geschichte,
wern jetzt vorgetraa die Korznorichte.
E Partner se hun, ja das iss schää,
bloß es Bett soll sei fer zwää.
Bis no Dernbach iss des noch net vorgedrung,
denn dort war die erscht Nacht e bissje mißlung.
Wie sich de Andi hot uff die Diana geschmess,
hots es Bett in alle Änzeldäle veress.
Weil die Rheinpfalz hatt e Fehler in ihrm Blatt,
hedden mer angeblich im Juli Kerb gehatt.
Äm Kerweborsch, dem war das net geheier,
dass mer hun noch kä Wa gebaut, drunne ins Uhle Scheier.
Sebastian, ich saa ders jetzt nochemol ganz klar,
Kerb iss Ofang Oktower, so wies schunn immer war.
E neies Dream-Team hummer in Gerbach wieder,
es besteht aus Schäfer Richard un Stocke Dieter.
Wie de Schäffling Hans im Acker war,
hot er sei Reife uff em Alzeberg sauwer gefahr.
Dodebei horrer awwer net beacht,
daß er em Junge Rudolf sei Haus hot dreckisch gemacht.
Om nägschte Dach konnt mer dann sieh,
daß de Michi un de Markus vor dem Haus dun knie.
Die hun dann nämlich weggebutzt,
was de Schäffling Hans dort hat vewutzt.
Wann eier Katz dut net barriere,
dun se zum Theo, der dut se dressiere.
Der erklärt ne dann, ich redd kä Stuß,
wie mer sich im Stroßevekehr vehalle muß.
Weil de Thilo in de Brick hot gelabert zu veel Scheiße,
dut mer ne uff die Strooß enaus veweise.
Die Aktion die hot ne seelisch ganz schee veletzt,
deswee horrer em Christian es Audo vekretzt.
Wann im Garte die Zucchini sprieße,
dut mer se in alle mögliche Variante genieße.
Es Koche Klärche hat so veel, un dut sich denke,
ich wer grad im Gässje de Gretel e paar schenke.
Die hot sich dodriwwer arisch gefreit,
un hot die Dinger ach gleich zubereit.
Beim Probiere vum Esse hotses getroff wie e Blitz beim Gewitter,
denn das Zeich, das war wie Gall so Bitter.
No einigem Iwwerlee do war der Fall glei klar,
daß das ganze Mahl aus Ziergemies war.
Wann die Enkelcher gewwen kä Ruh,
krien se vun de Oma jeden Wille gedu.
Die Hener Ingrid die hot gefackelt net lang,
un hot de Dorothee uff em Campingplatz e Ent gefang.
Weils Ruppsche hot Vorsjohr on de Kerb so veel gesoff,
isses im Gässje on e Bagger geloff.
Em Bagger is nix bassiert zum Glick,
awwer de Nicole ihr Aa war bloo un dick.
Doch dodemit hat se uns schee gelinkt,
denn es blooe Aa war nor geschminkt.
Ach ihr Leit, fascht hätt ichs vegess,
on de letscht Musik hot de Tobias die halb Hall ausenanner geress.
Es gibt e Märe im Ort, ich du net lie,
das kriet gasaat, was es uff e Musik hot osezieh.
E Rock wollts ozieh, do is die Mutter wor kleinlich,
do hot sichs misse in de Garage, umzieh ganz heimlich.
Mit 21 muss mer wisse, wie mer sich dut bekleide,
Ach wann die Glanze Gudrun do drunner als emol muss leide.
Es Ja-Wort is jetzt wirrer in,
deswee sin die Gerbacher im Heiratsfieber drinn.
Die Höhne Claudia die hots vorgemacht,
un fünf annere Paare hun die Fliterwoche ach schun vebracht.
Die Pärcher sin schun fleisich am Kinner produziere,
daß sich im e paar Johr die Grundschul dut noch rendiere.
De Schmidti hatt sich grad geleet zur Ruh,
uff ämol hots e Schlaach gedu.
Er hot gedenkt, er dut net richtich seh,
wie de Kicheschrank hot uffem Borrem gelee.
Mer lachen jetzt emol, Schmidt nemms uns net iwwel,
awwer e Schrank kammer net uffhänge mit sechser Diwwel.
De Heiner vezehlt 20 Johr alde Geschichte,
un mänt mer deten nimmi driwwer berichte.
Er hot sich damals e Joint eringezoo,
un uffem Hämweg sin riese Frösch vorm erumgefloo.
Die Bollebach Gertrud hot e Wespegiftallerige,
un grad om Audofreie Appeldal kriet se e Stich vun so me Vieh.
Doch wie sollt mer bringe die arm Fraa,
schnell zum Friedhof, denn dort wars DRK.
Zur Kennzeichnung vun dem Notfall, werd e Winnel ons Audo gehängt,
un mit Polizeischutz dann zum Doktor gelenkt.
De Stocke Hans-Werner mänt nor trocke ganz schnell,
do wär se im Notfall wenschtens glei on Ort un Stell.
De Andi der Banause,
läßt äfach de Polterowend sause.
Weil de Parrer Poppe dut jetzt im Kriesfeller Parrhaus sitze,
muscht die Luzie glei emol eniwwer flitze.
Sie wollt dene Fraue dort emol vezehle,
daß se den Mann net so arisch sollen quele.
Sie sollen net mim kreische, denn das träf den schwer,
weil er doch so arisch sensibel wär.
De Ede dut in de Brick Esse un Getränke serviere,
seit er dut mit de Wertin pussiere.
Bei de Maria do unne vekehrt als so e doller,
ehr kennen ne all, unser Willi Boller.
No rer Druckbetankung mit Bier un Klare,
harrer beschloss, ball häm se fahre.
Schnell hatt mer in de Kneip beschloss,
das do, das werd net zugeloss.
Se dritt hun se ne dann in sei Audo gezerrt,
un uff em Ricksitz ingesperrt.
De Runkel Schorsch hot dann es Steier in die Hand genumm,
so ess de Willi wenigschtens sicher no Delwe kumm.
Daß die Mäd beim Kotze lein net so hart,
kimmt uffs Brickegeländer jetzt e Schaumstoffmatt.
Wammer nix meh in de Kiehlschrank kriet,
weil mer vor lauter Eis sunscht nix meh sieht.
Dann sollt mer om beschte net so lang warte,
un gleich de Abtauvorgang starte.
Doch weil das em Andi is net schnell genug gang,
horrer mit de Spachtel se kretze ogefang.
Korz druff sieht mer de Andi flitze,
do wars Uglick schun bassiert,
die Kiehlflüssigkeit dut in de Geend rumspritzte,
weil er mit seim Werkzeich hat de Eisschrank ruiniert.
Seit de Foxi hot in Koblenz sei nei Bleiwe,
hummer in Gerbach iwwer den nix meh se schreiwe.
Mer hot die Sach schunn frieh gesieh kumme,
wie de Egon mim LKW de Hewwel eruf dut brumme.
Äner hot sei Audo geparkt uff de Strooß,
es war eng, awwer em Rupp sei Laschter der iss jo net so groß.
Er wurd dann awwer eines bessere belehrt,
wie er om Andres seim Audo die Seit veschamerert.
Beim Maué Hermann kann mer seh,
daß dort de neie Stadtpark dut entsteh.
De klää Berg der hot im Suff,
die Klapp geriss ziemlich weit uff.
Sei Gegner der hot sich gefiehlt e bissje gemobt,
un hot em dewee e Flasch uff de Kopp gekloppt.
Weil fer de Ausfluch e greßer Audo war gefordert,
hatt de Fuchse Dieter bei de VoBa de VW-Bus geordert.
Wie die dann in Gerbach es Schläfers abgeholt hunn,
hot mer de Bus mit uffener Heckdeer vorgefunn.
Schnell hot die Karola es Gepäck nogezählt,
un glei gemerkt, daß ebbes fehlt.
Bei rer sofortig Suchaktion konnt mer awwer alles finne,
es hot gelee beim Scheye Günther vorm Hof in de Rinne.
Die junge Kerwemäd muschten vesuche,
neie Wei un Zwiwwelkuche.
Wie werd mers awei dun die zwä denke,
un korz druff sah mer se iwwerm Brickegeländer hänge.
Die hun gekotzt, wie nimmi gescheit,
un die Fisch hun sich iwwer die nächtlich Fütterung gefreit.
Im Judehof gibts e kläner Hund,
der treibts mit de Leit ganz schää bunt.
Wann der sich arisch freie dut,
dann klappts mim Wasser losse nochemol so gut.
De Uwe hot den Hund gekrault, un is uff ämol wor ganz blaß,
wie er gemerkt hot, daß sei Hose vor Freid wern ganz Naß.
Weil em Gerdche sei Polterowend war voll de Renner,
macht de Helmut deno uffem Klo de Penner.
E nei Miss hummer in Gerbach, hunners schunn geheert,
un das nor, weil se so gern Traktor fährt.
Die Hahne Helga hot mer letschtens grad gekürt,
un seit dem se de Titel „Miss Lanz Bulldog“ führt.
Ich hun schunn gesucht, ich finn mix meh,
awwer bleiwen noch e bissje do unne steh.
Jetzt hoff ich nor noch fer uns all,
daß es eich hot wirrer gefall.
Un dene, die wo jetzt eruffguggen so streng,
dene saa ich noch, siehn das alles net so eng.
Eiern eich net, wamer iwwer eich hun was geschrebb,
es hot jo schließlich jeder schunn so dinger getrebb.
Dank, will ich noch on e ehemalische Kerweborsch saa,
wo wirrer mit seine Stickelcher zu de Kerweredd hot beigetraa.
Awwer jetzt will ich eich net länger quele,
ich wäs sowieso nix meh se vezehle.
Doch bevor ner jetzt Häm on de Kaffeedisch laafen,
will ich sieh, daß er all noch e Kerweredd kaafen.
Un ach om Weistand will ich eich begrieße,
wann er trinken vum Sauere orrer Sieße.
Jetzt krawwel ich klei enunner die Lädersprosse,
doch devor du ich nochemol die Kerb hoch lewe losse.
Die Gerbacher Kerb soll lewe
Hoch... Hoch... Hoch...